Vrastan

Թբիլիսիում էր գտնվում Բեռլինի, Վիեննայի եւ Նյու Յորքի ֆիլհարմոնիաների հայտնի մենակատար, աշխարհում ամենաբարձր երաժշտական «Գրեմմի» մրցանակի արժանացած, հայազգի, ամերիկյան աշխարհաճանաչ ալտահար Քիմ Քաշքաշյանը, որը մասնակցեց «Կոնտրապունկտ» երաժշտական փառատոնին։ Նրա հետ մեկտեղ, փառատոնին մասնակցեց նաեւ նշանավոր կոմպոզիտոր, արվեստի վաստակավոր գործիչ, երեւանցի Տիգրան Մանսուրյանը։

«Կոնտրապունկտը» ամենամյա խոշոր իրադարձություններից մեկն է Վրաստանի մայրաքաղաքի մշակութային կյանքում։ Այն արդեն հինգերորդ տարին անընդմեջ անցկացվում է Եվգենի Միքելաձեի անվան երաժշտական կենտրոնում։
Փառատոնին հասարակայնությանը ավանդաբար ներկայացվում են ժամանակակից մեկ վրացի եւ մեկ օտարերկրացի կոմպոզիտորի  ստեղծագործությունները։ Այս անգամ ունկնդիրների դատին հանձնվեցին Վրաստանի ժողովրդական արտիստ, արվեստի վաստակավոր գործիչ Վաժա Ազարաշվիլու եւ հայկական կոմպոզիտորական դպրոցի ժամանակակից դասական Տիգրան Մանսուրյանի ստեղծագործությունները։ Դրանք հնչեցին դիրիժոր եւ կոմպոզիտոր, Վրաստանի ազգային ֆիլհարմոնիայի նվագախմբի ղեկավար Նիկա Ռաճվելու ղեկավարած նվագախմբի կողմից։ 

Վրաստանի նախագահ Միխեիլ Սաակաշվիլին ապրիլի 17-18-ին գտնվում էր Ախալքալաքիում։

 Շրջանում գտնվելու ընթացքում, երկրի ղեկավարը Ախալքալաքիում այցելեց թիվ 3 վրացական հանրային դպրոցը եւ ներկա գտնվեց պատմության դասին։ Այցի ժամանակ, նա դպրոցի տնօրեն Լելա Ճինճարաուլուն պարգեւատրեց Պայծառափայլության նախագահական շքանշանով։
Դպրոցում նախագահը զրուցեց աշակերտների հետ եւ ուշադրություն բեւեռեց երկրի նորագույն պատմության վրա։ Մանկավարժների հետ զրույցում նա նույնպես կարեւորեց Վրաստանի պատմության ուսուցումը։
Վրաստանի նախագահը նաեւ այցելեց Գումբուրդոյի Սուրբ Զոսիմի անվան ուսումնական պանսիոնատ, որը ստեղծվել է Սրբազան Նիկոլոզի ջանքերով։
Միխեիլ Սաակաշվիլին դիտեց ուսումնական հաստատությունը, ծանոթացավ տեղում պատրաստած առարկաներին եւ դիտեց այստեղ նկարահանված ֆիլմեր։

Վրաստանի խորհրդարանը ձեռնամուխ է եղել աշխատանքային օրենսգրքում կատարվելիք ուղղումների քննարկմանը, որոնց համաձայն, շաբաթական 40 ժամից ավելի եւ հանգստյան օրերի աշխատանքը պետք է վճարվի՝ որպես արտաժամյա։

Օրինագծի համաձայն, Վրաստանում աշխատանքային օրը 18 տարեկանից բարձր անձանց համար չպետք է լինի 40 ժամից ավելի՝ հնգօրյա աշխատանքի ընթացքում, 16-ից բարձր՝ 36 ժամ, 14 տարեկանից բարձր՝ 24 ժամ։ Արտաժամյա աշխատանքը ենթադրում է ժամավճար։ Կողմերի համաձայնության դեպքում, արտաժամյա աշխատանքը կարող է հատուցվել լրացուցիչ հանգստյան օրով։
Արտաժամյա համարվում է այն աշխատանքը, որ մարդը կատարում է ըստ գործատուի հետ համաձայնության, եւ որի տեւողությունը շաբաթվա ընթացքում (հինգ աշխատանքային օր¤ գերազանցում է 40 ժամը։ Արտաժամյա է համարվում նաեւ պաշտոնական տոնակատարությունների օրերին կատարվող աշխատանքը։

Շարունակում ենք ներկայացնել հատվածներ «Թբիլիսի. զբոսաշրջիկի տեղեկատու» անգլերենով եւ ռուսերենով ուղեցույցի՝ մեր քաղաքի պատմական ու մշակութային արժեքավոր հուշարձանների եւ կառույցների մասին պատումնաշարից:

Կոտե Աբխազիի փողոց.
«ԱՐՄՅԱՆՍԿԻ ԲԱԶԱՐ»...
Գորգասալի հրապարակից վերեւ Կոտե Աբխազիի (նախկին՝ Լեսելիձե) փողոցն է: Միջնադարում այն անվանում էին Շուա-բազարի, որ թարգմանաբար նշանակում է՝ մեջտեղի շուկա: Այն բաժանում էր քաղաքը վերին ու ստորին հատվածների: Սկզբունքորեն պաշտոնական շուկա այստեղ երբեք չի եղել, բայց փողոցը մշտապես իր կենդանությամբ է առանձնացել: Ժողովրդի մեծ մասը քաղաքի հենց այս մասով է անցուդարձ արել: «Առավոտից մինչ ուշ երեկո այստեղ տարածվում էին մուրճի հարվածների ձայներն ու խաղային ոսկրիկների թխթխկոցը, աշուղների երգերը, գրաստապանների գոչյունները, զուռնայի կպչուն լալկանությունը, դհոլի թնդյունն ու ուրախ դմդմբոցը… Այս ամենն ընդհատվում, կորչում ու լուծվում էր ընդհանուր աղմուկի, բազմության ու եռուզեռի մեջ: Անմիջապես գետնի վրա շարված էին քաղցր խաղողի կույտերը, մասնատած սաթե եգիպտացորենը, լոլիկները, բաց մանուշակագույն սոխը, ճերմակվում էին ոչխարի պանրի գնդերը.... Կյանքը փողոցում եռում էր....», - գրում էր Իրակլի Անդրոնիկովը (1908-1990թթ. սովետական գրող, գրականագետ, ՍՍՀՄ ժողովրդական արտիստ):

Շարունակում ենք ներկայացնել հատվածներ «Թբիլիսի. զբոսաշրջիկի տեղեկատու» անգլերենով եւ ռուսերենով ուղեցույցի՝ մեր քաղաքի պատմական ու մշակութային արժեքավոր հուշարձանների եւ կառույցների մասին պատումնաշարից:

ԹԲԻԼԻՍԻԻ ՊԵՏԱԿԱՆ ՀԱՅԿԱԿԱՆ ԴՐԱՄԱՏԻԿԱԿԱՆ ԹԱՏՐՈՆ. Քեթեւան Ծամեբուլու պողոտա 8
«Ավլաբարի» մետրոկայարանի մերձակայքում գտնվում է Պ.Ադամյանի անվան Թբիլիսիի պետական հայկական դրամատիակական թատրոնը, որն արդեն 157 տարեկան է: Նոր շենքի բացման հանդիսավոր արարողությունը կատարվել է 1936թ.: (Խմբ.կողմից։ Շենքի ճարտարապետը Գաբրիել Տեր-Միքելովն է։ Հայտնի ճարտարապետը նախագծել է նաեւ Թբիլիսիի Մերիոտ հյուրանոցը)։ Խորհրդային Միության տարիներին թատրոնն ստացել է պետականի կարգավիճակ, իսկ 1991թ. կրում է հայ բեմի XIX դարի կորիֆեյներից մեկի` Պետրոս Ադամյանի անունը: (Խմբ. կողմից։ Շենքի վթարային լինելու պատճառով, թատրոնի բեմում ներկայացումներ ժամանակավորապես չեն ցուցադրվում: Այդուհանդերձ, թատերախումբը, բեմադրիչները շարունակում են իրենց գործունեությունը եւ ներկայացումներով հանդես գալիս ինչպես Թբիլիսիի թատերաբեմերից մեկում, այնպես էլ՝ հյուրախաղային ծրագրերով երկրի հայաբնակ շրջաններում, ինչպես նաեւ Հայաստանում):