Vrastan

2016 թվականից չհարկադրված նվազագույնի փոխհատուցումը կվերացվի, քանի որ կսկսի գործել սոցիալական օգնության բարելավված համակարգ։

Օրենսդրությունում ծրագրված փոփոխությունների նման բացատրություն տվեց Վրաստանի ֆինանսների փոխնախարար Գիորգի Կակաուրիձեն, փոփոխություններ, ըստ որի, 2015 թվականի եկամուտների վրա չհարկադրված նվազագույնի մասին օրենքը չի տարածվի։ «Գլխավորն այն է, որ գումարը, որը մենք ծախսում ենք, առավել արդյունավետ լինի։ Չհարկադրված նվազագույնի ծրագրի նպատակն այն էր, որ նվազ եկամուտ ունեցող բնակչությանը տրվեր այն վերադարձնելու հնարավորություն։ Թեպետ, ի տարբերություն 2012 թվականի, 2015 թվականի հունվարի 1-ից կներդրվի նոր մեթոդոլոգիա, ըստ որի, սոցիալապես անպաշտպան բնակչության գնահատումը կիրականացվի ոչ թե սուբյեկտիվ գործոնների հաշվառմամբ, այլ՝ օբյեկտիվ չափորոշիչներով։ Կարծում եմ, որ գերադասելի է օգնությունը ստանան օբյեկտիվ չափորոշիչներով գնահատված սոցիալապես անպաշտպան անձինք, ովքեր դրա կարիքն առավել են զգում։ 2012 թվականից սոցիալական օգնությունը գրեթե կրկնապատկվել է, իսկ 2015 թվականին կիրականացվի նպատակային օգնության ծրագիրը»,- հայտարարեց Գիորգի Կակաուրիձեն։

Դեկտեմբերի 10-ին Ախալցիխեում Վրաստանի ժողովրդական պաշտպանի ինստիտուտի պատմության մեջ առաջին անգամ օմբուդսմենի տարածաշրջանային ներկայացուցիչը հանդես եկավ ազգային փոքրամասնությունների իրավունքների վիճակի եւ պաշտպանության հաշվետվությամբ։

Ախալցիխեի Ժողովրդավարական ներգրավման USAID կենտրոնում Վրաստանի ժողովրդական պաշտպանի տարածաշրջանային ներկայացուցիչ Արմեն Մարանգյոզյանը ելույթ ունեցավ 2013 թվականին ազգային փոքրամասնությունների իրավունքների վիճակի եւ պաշտպանության մասին հաշվետվությամբ։ Ելույթն առնչվում էր դեկտեմբերի 10-ին մարդու իրավունքների միջազգային օրվան։

Պարտադիր ավտոապահովագրումը անորոշ ժամանակով հետաձգվել է։ Որոշ ենթադրություններով, գործընթացը կիրականացվի 2016 թվականին։

Պարտադիր ավտոապահովագրման ստույգ ժամկետների նշումից հրաժարվեց պետական վերահսկողության ծառայությունը, թեպետ հավաստիացրին, որ դրա հետաձգումը երկար ժամանակ չի տեւի։ Ծառայության հավաստմամբ, համապատասխան օրինանախագիծն արդեն ներկայացված է խորհրդարան, եւ դրա քննարկումից ու ընդունումից հետո միայն, հայտնի կդառնա պարտադիր ավտոապահովագրման ժամկետը։ Ինչպես նշեցին ծառայությունում, պարտադիր ավտոապահովագրման գործընթացի ներդրման ուղղությամբ, օրենքի իրավաբանական շրջանակի տեխնիկական բաժնի մշակմանը, որը վերաբերում է ապահովագրական գումարի մարմանը, հավելավճարին, պատժատուրքին եւ մյուս հանգամանքներին, ավարտման փուլում է։ Որոշ անհարթություններ կան նաեւ պարտադիր ապահովագրման մյուս բաժինների հարցով։ Այդ առումով ներկայացված են մի քանի տարբերակներ եւ ներկայումս համապատասխան մարմիններն զբաղված են առկա մանրամասների հստակեցման եւ երկրի պայմաններին համապատասխանեցման աշխատանքով։

«Սեր, կրկես, Փարիզ»՝ ահա այս վերնագրով հայաստանաբնակ նկարիչ Շոթա Ոսկանյանը Թբիլիսիի կենտրոնում գտնվող Գամրեկելի անվան ցուցասրահում ներկայացրեց իր 30 աշխատանքը։

Ցուցահանդեսը նախաձեռնել էր Վրաստանի մշակույթի նախարարությունը՝ Վրաստանում Հայաստանի դեսպանության աջակցությամբ։
Երկու խոսք նկարչի մասին։ Շոթա Ոսկանյանը ծնվել է 1960թ., Երեւանում։ 1987թ. ավարտել է Մոսկվայի գեղարվեստական համալսարանը, Հայաստանի նկարիչների միության անդամ է։ Ունեցել է անհատական ցուցահանդեսներ Երեւանում։

Բյուջետային միջոցների ճիշտ բաշխման, այդ թվում՝ վարչարարական ծախսերի կրճատման հիման վրա 2013-2014 թվականների պետական բյուջեները, ի տարբերություն նախորդ տարիների, արմատականորեն փոխվեցին եւ ձեռք բերեցին սոցիալական կողմնորոշում։ Այդ մասին դեկտեմբերի 4-ին հայտարարեց Վրաստանի ֆինանսների նախարար Նոդար Խադուրին, հանրագումարելով գերատեսչության երկու տարվա աշխատանքի արդյունքները։

Նախարարի խոսքերով, բյուջետային միջոցները լրիվությամբ ուղղված էին կառավարական ծրագրով եւ «Վրացական երազանք» կոալիցիայի նախընտրական ծրագրով նախատեսված առաջնահերթությունների ֆինանսավորմանը։ Նա նշեց, որ վերջին երկու տարիների ընթացքում նախարարությունը կարեւոր քայլեր է իրականացրել բնակչության սոցիալական աջակցության ուղղությամբ։ Մասնավորապես, տարիքային բոլոր կատեգորիաների կենսաթոշակառուների եւ բացահայտ սահմանափակ հնարավորություն ունեցող անձանց կենսաթոշակը հասցվել է 150 լարիի, իսկ մյուս բոլոր կատեգորիաների կենսաթոշակառուների կենսաթոշակը՝ 100 լարիի։ Մինչեւ 2005 թվականը՝ ուժային կառույցներից հեռացված անձանց կենսաթոշակը սահմանվել է ելնելով նրանց ծառայության ժամկետից ու վաստակից։

ՀԱՆՐԱԳՈՒՄԱՐՎԵՑԻՆ ԵՐԿՈՒ ՏԱՐՎԱ ԱՇԽԱՏԱՆՔԻ ԱՐԴՅՈՒՆՔՆԵՐԸ

Դեկտեմբերի 1-ին Վրաստանի գյուղատնտեսության նախարար Օթար Դանելիան հանրագումարեց իր գլխավորած գերատեսչության երկու տարվա աշխատանքների արդյունքները։ «Վրաստանի կառավարությունը՝ բաց կառավարման համար» նախագծի շնորհանդեսի շրջանակներում անցկացված միջոցառմանը, ներկա էին Վրաստանի էկոնոմիկայի նախարար Գիորգի Կվիրիկաշվիլին, ֆինանսների նախարար Նոդար Խադուրին, պաշտոնական այլ անձինք։

«2013-2014 թվականներն աչքի ընկան բոլոր ուղղություններով փաստացի աճի միտումով։ Առանձնակի կընդգծեի հաջող անցկացված խաղողաքաղը, ագրոապահովագրության նախագիծը, սուբսիդավորման նախագիծը, ինստիտուցիոնալ զարգացումը։ Կարեւոր նշանակություն ունի, որ այդ գործընթացը շարունակվի 2015 թվականին։ Մենք մշակում ենք նոր ռազմավարություն, որը նախատեսում է մինչեւ 2020 թվականը նախարարության կողմից իրականացվելիք միջոցառումները»,- նշեց Օթար Դանելիան եւ հավելեց, որ վերջին երկու տարիների ընթացքում գյուղատնտեսության զարգացման համար ծախսվել է շուրջ 900 միլիոն լարի։ Ինչպես նշեց գյուղատնտեսության նախարարը, 23-ամյա անկումից հետո տնտեսության այս ճյուղը սկսել է ընթանալ զարգացման ուղիով եւ գյուղացիներին տրվեց տնտեսություններն ընդլայնելու, մշակված հողերի տարածքները մեծացնելու ազդակ։

Վրաստանի կրթական համակարգը, ուսուցման որակը բարելավելու եւ արդյունավետ դարձնելու համար, հեռատես ու համարձակ քայլեր է անում՝ եվրոպական չափանիշներին հասնելու աներեր վճռականությամբ։

Դա, հարկավ, ողջունելի նախաձեռնություն է։ Վերջին տարիներին ուսումնա-դաստիարակչական աշխատանքը երկրում զգալի վերելք է ապրել։ Առանձնապես, բեկումնային ընթացք ունեցավ մեր դպրոցում վրաց լեզվի դրվածքը. հայկական կրթօջախներում վրաց լեզուն ուսումնասիրվում է մայրենիի խորությամբ ու չթուլացող հետեւողականությամբ։ Նկատենք, որ կենտրոնից հեռու ընկած ծայրամասային հայկական գյուղերում գործող երկլեզու ուսուցումը տվել է իր նկատելի պտուղները։

Օտարերկրյա քաղաքացիություն ունեցող եւ քաղաքացիություն չունեցող անձանց ընդհանուր կրթության համար ուսման վարձը կվճարի պետությունը։ Համապատասխան փոփոխությունն արդեն կատարվում է Վրաստանի ընդհանուր կրթության մասին օրենքում այն բանից հետո, երբ Վրաստանի Սահմանադրական դատարանի որոշմամբ, որը հակասահմանադրական է ճանաչվել օրենքի այն նորմը, որի համաձայն, պետությունը ֆինանսական պատասխանատվություն չի կրում օտարերկրյա քաղաքացիների կրթության համար։ Վերոնշյալ օրենսդրական փոփոխության առաջադրման նախաձեռնությունը պատկանում է «Վրաստանի երիտասարդ իրավաբանների ասոցիացիային»։

Նախ մի քանի խոսք՝ վեճի առարկա հանդիսացող որոշման մասին։ Դեռեւս 2010 թվականի ապրիլի 20-ին ընդունվեց «Ընդհանուր կրթության մասին» Վրաստանի օրենքը, ըստ որի, սկսած 2010-2011 ուստարվանից պետությունը չի վճարելու հանրակրթական դպրոցներում այն աշակերտների ուսման վարձը, ովքեր օտարերկրյա քաղաքացիներ են, եւ աշակերտներն իրենք պետք է մուծեն ուսման համար նախատեսված վաուչերի արժեքը։ Եթե աշակերտը չէր վճարում ուսման վարձը, ապա նրա՝ աշակերտի կարգավիճակը կանգնեցվում էր, թեպետ նա՝ որպես ազատ ունկնդիր, կարող էր ներկա գտնվել դասերին։