ԹԻՖԼԻՍՅԱՆ ԵՐԵԿՈ ԵՐԵՎԱՆՈՒՄ

Տպել

2014թ. ապրիլի 22-ին Արամ Խաչատրյանի տուն-թանգարանում կայացավ տոհմիկ թիֆլիսահայ, մշակութային գործիչ, արվեստի գործերի հավաքորդ, տեխնիկական գիտությունների դոկտոր Ալեքսանդր Պիրադովի հերթական հեղինակային երեկոն` «Թիֆլիսյան նոստալգիա» խորագրով:

Դահլիճում ներկայացված էին նկարիչներ Լ.Բոյախչեւի, Գ.Գրիգորյանի, Ա.Դիլբարյանի, Լ.Ճողոշվիլու, Թ.Մաճավարիանու, Շ.Մատուաշվիլու` Ա.Պիրադովի անձնական հարուստ հավաքածուի նմուշներ հանդիսացող գեղանկարչական աշխատանքները, որոնց Ալեքսանդր Բոգդանովիչը տալիս էր հետաքրքիր բացատրություններ, թե այս կամ այն գեղանկարում ինչ է պատկերված եւ, թե ինչ է ցանկացել արտահայտել հեղինակը:
Դաշնամուրային կատարումներով հանդես եկավ Ա.Խաչատրյանի տուն-թանգարանի տնօրեն, կոնսերվատորիայի պրոֆեսոր Արմինե Գրիգորյանը: Ալեքսանդր Պիրադովը նշեց, որ Արամ Խաչատրյանի երաժշտությունը հայկական լինելով հանդերձ, այնուամենայնիվ, թիֆլիսյան է:
Հայ եւ վրաց բանաստեղծների ու կոմպոզիտորների ստեղծագործությունները կատարեցին Վաժա Ազարաշվիլին, Վիլլի Գրիգորյանը, Անրի, Քրիստինա եւ Ռեգինա Մեյրաբովները, Թբիլիսիի հայկական պետական թատրոնի դերասան Սամվել Էլբակյանը, Թամարա Յաշակյանցը, Բաչանա Ցիրկվաձեն:
Ա.Պիրադովը ողջ երեկոն վարեց երիտասարդական ավյունով: Ժպտադեմ հանդիսականները միմյանց ականջին շշուկով հարցնում էին, արդյոք նա 81, թե 51 տարեկան է: Մեկը պնդում էր, թե 81 է, մյուսը՝ թե 51, իսկ մտերիմները նրան կանչում էին ուղղակի «Դյադյա Շուրիկ»:
Կատարողական համարների արանքում Ա.Պիրադովը հետաքրքիր դեպքեր էր պատմում թիֆլիսի կյանքից, արտասանում հայ եւ վրաց բանաստեղծների, ինչպես նաեւ Օսիպ Մանդելշտամի ստեղծագործություններից:
Պատմեց, թե ինչպես է մի հնավաճառից գնել անվանի հայ նկարիչ Էդգար Շահինի աշխատանքը, որը ժամանակին հեղինակը նվիրել էր Ալեքսանդր Շիրվանզադեին:
Ա.Պիրադովը ներկաներին հիացնում էր իր արտիստիզմով, ժեստերով, դիմախաղով: Չնայած առաջացած տարիքին կենսախինդ էր, սուր հումորով, պայծառ հիշողությամբ, բարձր ինտելեկտով, փայլում էր իր անսպառ գիտելիքներով կերպարվեստի, երաժշտության, պոեզիայի, թատրոնի մասին: Ազատ խոսում եւ արտասանում էր գրական հայերեն, վրացերեն եւ ռուսերեն:
Բոլոր կատարումները ավարտվում էին բուռն ծափահարություններով: Հանդիսատեսը հիմնականում նախկին թբիլիսցիներն էին, տարեց պապիկներ ու տատիկներ:
Մարդիկ երեկոյից հեռացան իրենց հետ տանելով հետաքրքիր տպավորություններ ու անջնջելի հիշողություններ:

ՀԱՐՈՒԹՅՈՒՆ ՄԻՆԱՍՅԱՆ
Գրող
Երեւան