Վերջերս Թբիլիսիի «Հայարտուն» կենտրոնում, մասնակցությամբ հայ ու վրացի մտավորականության ներկայացուցիչների, հոգեւոր դասի՝ գլխավորությամբ Վիրահայոց թեմի առաջնորդ Վազգեն եպիսկոպոս Միրզախանյանի, կայացավ վրաց գրականության փառքերից մեկի, դասական գրող, ակադեմիկոս Իոսեբ Գրիշաշվիլու ծննդյան 125-ամյակին նվիրված հոբելյանական երեկո: Միջոցառման օրը ամենեւին էլ պատահական չէր ընտրված կազմակերպիչների՝ Վրաստանի հայ երաժիշտների եւ գրողների «Վերնատուն» միությունների կողմից: Այն խորհրդանշում էր Գրիշաշվիլու՝ Սայաթ-Նովայի հավերժացման գործում ներդրած վիթխարի ավանդի դերը եւ ուղղակիորեն կապվում հաջորդ օրը՝ մայիսի 25-ին Վարդատոնի անցկացման հետ, քանզի Գրիշաշավիլին նաեւ առաջին՝ 1914 թվականի Վարդատոնի առաջին կազմակերպիչներից է Հովհ.Թումանյանի ու Գ.Բաշինջաղյանի հետ միասին:
Միջոցառումը, որը վարեց Վրաստանի հայ երաժիշտների միության նախագահ Արտեմ Գրիգորենցը, սկսվեց Իոսեբ Գրիշաշավիլուն ներկայացնող տեսահոլովակի ցուցադրմամբ, Թաբոր լեռան լանջին թառած թբիլիսյան Խարփուխ թաղամասին (որտեղ ծնվել ու ապրել, որով ներշնչված իր ստեղծագործություններն է գրել դասականը) նվիրված իր բանաստեղծություններն էր ընթերցում թբիլիսցի նկարիչ Ջովանի Վեփխվաձեն…
Գրիշաշվիլու կյանքի ու գրական-հասարակական, բազմաբղետ գործունեության, հայ գրողների հետ նրա կապերի մասին խոսեց եւ Ավ.Իսահակյանի թարգմանությամբ նրա ստեղծագործություններից ընթերցեց «Վերնատուն» միության նախագահ, բանաստեղծ Ժորա Սնխչյանը:
Անահիտ Բոստանջյանը հատկապես կարեւորեց Գրիշաշվիլու՝ որպես հայ-վրաց բարեկամության ջահակրի, դերը հայ-վրաց գրական կապերի խորացման գործում, նրա հետազոտական, թարգմանական գործունեությունը՝ Շիրվանզադեից. Նար-Դոսից, Թումանյանից, Վշտունուց, Մահարուց նրա թարգմանությունները, ընդգծելով «Մի կաթիլ մեղր»-ի հանճարեղ թարգմանությունը…
Գրիշաշվիլուն նվիրված իր վրացերեն բանաստեղծությունները կարդաց վրացագիր գրող Գարրի Ղալամքարովը:
Բանաստեղծ, թարգմանիչ, հասարակական գործիչ Գիվի Շահնազարը խոսեց թե՚ հայ-վրացական կապերի ամրապնդման գործում Գրիշաշվիլու դերի, թե՚ «Սայաթ-Նովա» մենագրության մասին՝ որպես կարեւոր էջի սայաթնովագիտության մեջ եւ թե՚ որպես մեծ թբիլիսցու մասին:
Գրիշաշվիլի - Սայաթ-Նովա կապի մասին էր նաեւ Վրաստանի գրողների միության նախագահ, բանաստեղծուհի Մաղվալա Գոնաշվիլու խոսքը: Նա առաջարկեց նաեւ սահմանել Սայաթ-Նովայի անվան ամենամյա մրցանակ:
Նման միջոցառումների անհրաժեշտությունն ու կարեւորությունն ընդգծեց «Վրաստան» թերթի խմբագիր Վան Բայբուրթյանը:
Միջոցառմանը միացավ նաեւ Սայաթնովյան Վարդատոնի առիթով Թբիլիսի այցելած հայաստանյան գրողների պատվիրակությունը՝ ՀԳՄ նախագահ Էդվարդ Միլիտոնյանի գլխավորությամբ, որը եւ հանդես եկավ ողջույնի եւ օրվա խորհուրդը արժեւորող շնորհավորանքի ջերմ խոսքով:
Գրիշաշվիլու բանաստեղծությունների գեղեցիկ ընթերցումներով հանդես եկան Սուրբ Եղիա Մարգարեի անվան կիրակնօրյա դպրոցի սաները (վաստակաշատ ուսուցչուհի Ռոզա Զոհրաբյան):
ԱՆԱՀԻՏ ԲՈՍՏԱՆՋՅԱՆ