Ընթացիկ տարվա նոյեմբերի 9-ին, Վրաստանի երիտասարդության ազգային պալատում, տեղի ունեցավ երկրի երիտասարդ բանահավաքների 17-րդ հավաքը, որը անց է կացվում երկու տարին մեկ հաճախականությամբ: Նշենք, որ, երբ 1970 թվականին առաջին անգամ նմանատիպ միջոցառում կազմակերպվեց «Վրաց լեզվի գանձարանի» կողմից, ընդամենը տասը աշխատանք էր ներկայացվել, իսկ այսօր դրանց թիվը գերազանցում է հարյուրը:
Միջոցառման նախաձեռնողը Վրաստանի երիտասարդության ազգային պալատի՝ Վախթանգ Կոտետիշվիլու անվան բանահյուսության առանձնասենյակն էր՝ Թբիլիսիի Իվանե Ջավախիշվիլու անվան պետհամալսարանի Շոթա Ռուսթավելու անվան վրաց գրականության պատմության ինստիտուտի բանահյուսության բաժանմունքի աջակցությամբ:Միջոցառման նպատակն էր աջակցել ժողովրդական բանահյուսության նմուշների ուսումնասիրությամբ, որոնմամբ եւ հետազոտությամբ հետաքրքրվող երիտասարդությանը՝ նպաստելով նրանց գիտելիքների խորացմանն ու սեփական աշխատանքների ներկայացմանը: Հավաքին իրենց մասնակցությունն էին բերել Վրաստանի տարբեր շրջանների հանրային եւ մասնավոր դպրոցների, գիմնազիաների, կրթական հաստատությունների 6-12-րդ դասարանների սաներ եւ բարձրագույն կրթական հաստատությունների ուսանողներ: Նրանց թվում էին Նինոծմինդայի մունիցիպալիտետի Գանձա գյուղի Շոթա Ռուսթավելու անվան թիվ 2 եւ Ախալքալաքիի մունիցիպալիտետի Վաչիան գյուղի դպրոցների աշակերտները:
Արդեն 5 տարի է, ինչ Վրաստանի կրթության եւ գիտության նախարարության «Վրացերենը՝ որպես երկրորդ լեզու» ծրագրի շրջանակներում (ղեկավար՝ Մակո Ճիլաշվիլի), Նինոծմինդայի Գանձա գյուղում վրացերեն է դասավանդում տիկին Նանա Միխանաշվիլի-Բարջաձեն: Գործի նկատմամբ նրա պատասխանատվության եւ նվիրումի աստիճանը տեսնել ու զգալ է պետք: Բանիմաց մանկավարժն իր մայրենիի նկատմամբ մեծ սիրով է տոգորված, ու այդ սերը կարողանում է փոխանցել սաներին, անկեղծորեն ուրախանալ նրանց ամեն մի առաջընթացի համար: Տարիներ առաջ նրա նախաձեռնությամբ էր, որ առաջին անգամ գանձացի դպրոցականները ժամանեցին Թբիլիսի՝ գլուխ խոնարհելու հայ ու վրաց մեծերի շիրիմներին Խոջիվանքի եւ Մթածմինդայի պանթեոններում, ծանոթացան ու բարեկամացան մայրաքաղաքի թիվ 104 դպրոցի հետ: Բազում միջոցառումների հեղինակ ուսուցչուհին ակտիվորեն մասնակից է դարձնում սիրելի սաներին Վրաստանի կրթության ու գիտության նախարարության, տարբեր կազմակերպությունների եւ հաստատությունների կողմից կազմակերպվող միջոցառումներին։ Եվ գոհանում է, որ իր բոլոր բարի ու լավ ձեռնարկների սատարողը դպրոցի տնօրեն Սարգիս Դուրգարյանն է եւ հարազատ կոլեկտիվը, անմասն չեն մնում նաեւ ծնողները:
Այս անգամ սրահներից մեկում ցուցադրվել էին աշակերտների ձեռագործ աշխատանքները՝ նկարչության, ասեղնագործության, մանածագործության, կտավագործության, մատղաշաբրդի նմուշներ: Մեկ այլ սրահում, սեկցիոն նիստի ժամանակ աշակերտները ներկայացրին իրենց կողմից հավաքագրած ժողովրդական բանահյուսության օրինակները: Լսարանը համակ ուշադրությամբ ունկնդրեց Ծովինար Հախվերդյանի «Իմ գյուղի ավանդույթները», Ռուզաննա եւ Զարուհի Աթորատալյանների «Մանկական խաղեր» եւ Արմեն Սիրականյանի «Հայկական առածներ եւ հանելուկներ» վրացերենով զեկույցները: Վերջում Հայելապատ դահլիճում մասնակիցները հանդես եկան երաժշտական համարներով: Գանձացիները ներկայացան Վրաստանին նվիրված խոսքով, վրացական ժողովրդական երգերի շարանով ու «Սայաթ-Նովա» (մենապարուհի՝ Աննա Գրիգորյան), «Քոչարի» պարերով:
Իրենց զուլալ ձայնով ու անթերի կատարումներով՝ Ռ.Լաղիձեի «Թբիլիսո» եւ վրացական ժողովրդական երգերի ելույթով ներկաներին հիացրին նաեւ Վաչիանի (ուսուցչուհի՝ Ռուսուդան Բերիձե) դպրոցականները:
Հաջողված ելույթների համար մասնակիցները պարգեւատրվեցին դիպլոմներով ու պատվոգրերով, իսկ ջավախեթցիներն արժանացան նաեւ Պալատի տնօրեն Քեթեւան Փեիքրիշվիլու եւ հանձնաժողովի մյուս անդամների դրվատանքին:
ԿԱՐԻՆԵ ՄԱՆՈՒԿՅԱՆ
Վրաստանի կրթության ու գիտության նախարարության ազգային ուսումնական ծրագրերի վարչության ոչ վրացալեզու ուսումնական նյութերի համակարգող
